БИШКЕК, 4-июн. — Sputnik. Бишкек шаары жана Арашан, Таш-Мойнок, Кара-Жыгач, Лебединовка, Көк-Жар айыл өкмөттөрү үчүн сугат жана таза суунун маанилүү булагы болуп саналган Аламүдүн дарыясында суунун көлөмү нормадан үч-төрт эсе аз болууда. Бул туурасында Айыл чарба министрлиги билдирди.
Дарыя 7 690 гектар жер аянтын сугат суу менен камсыз кылары белгиленди. Анүчүн суу Аламүдүн дарыясында секундасына 5-7 метр куб болушу зарыл. Апрель-май айларында түнкүсүн абанын температурасы төмөн болгондугуна байланыштуу суунун агымы нормадан үч-төрт эсе аз болуп тартыштык жаралган.
Андыктан сугат суу кезек менен ар бир айыл өкмөткө эки күндөн берилип жатат.
"Кара-Жыгач айыл өкмөтүнүн дыйкандары да сууну түзүлгөн кезекке жараша алып турушкан. Мындан сырткары, Аламүдүн дарыясынан суу алган 7 690 гектар жердин 1 020 гектарына кулпунай жана малина отургузулган. Бул өсүмдүктөргө караганда сугат үчүн 4-6 эсе көп суу талап кылынат. Акыркы эки-үч күндө абанын температурасынын жогорулашына байланыштуу суунун деңгээли көтөрүлө баштады, бирок дагы эле жетишсиз", — деп айтылат маалыматта.
Суу ресурстары кызматы Аламүдүн районунун фермерлерин эмес, Бишкек шаарын сугат жана таза суу менен камсыз кылууга аракет кылып жатканы белгиленди.
Буга чейин Бишкек мэриясы ичүүчү суунун тартыштыгынан улам сууну көп сарптаган менчик мончолор, унаа жуучу жайлар, бассейндер убактылуу жабылып жатканын билдирген.