Айрым учурда жарандар кымбат эмес буюму жоголуп, арыз менен кайрылса күч органдары кабыл албай койгонун айтышат. Мындайда прокуратурага ошол милиция кызматкеринин үстүнөн арыз жазса болот. Бул тууралуу Куватбек Шатманов Sputnik Кыргызстан радиосуна маек куруп жатып билдирди.
Анын айтымында, милиция кызматкеринин арызды кабыл албай койгону кылмышты жашырып койгондукка жатат.
"Жарандардан уурулук боюнча арыздар буюм 1000 сомго бааланган учурдан тарта кабыл алынат. Тагыраак айтканда, жоготкон буюмуңуз 1000 сом турса, милицияга анын уурдалгандыгы тууралуу арыз менен кайрылсаңыз болот жана тартип сактоочу арызды кабыл алып каттоого милдеттүү. Кээ бир учурда мындай көп эмес суммага бааланган буюм боюнча келген арызды каттоодон милиция кызматкери баш тартып койгонун айтып калышат. Мындай болсо дароо ошол милиция өкүлүнүн үстүнөн прокуратурага же ИИМдин башка жогорку органдарына кайрылса болот. Бул жөн эле шалаакылык эмес, кылмышты жашырып койгондукка жатып, атайын берене менен милициянын үстүнөн иш козголушу мүмкүн. Болбосо кызматтык иликтөө жүргүзүлөт. Айтор, мындай учурда милиция кызматкери жоопко тартылбай калбайт", — деди Шатманов.
Ал милиция кызматкери арызды кабыл албай койсо, анын аты-жөнүн, ээлеген кызматын, арызды кабыл албай жаткан жүйөсүн тактап алып, баарын жазылган арызда көрсөтүү зарылдыгын кошумчалады.