БИШКЕК, 31-май — Sputnik. Жогорку Кеңеште прокуратура органдарынан тергөө функциясын алып салуу мыйзам долбоору биринчи окуудан өттү.
Аталган демилгени президент Садыр Жапаров сунуштап, парламентте юстиция министри Аяз Баетов баяндама жасады.
"Мыйзам долбоору укук коргоо органдары системасында тең салмактуулук принцибин камсыздоо менен жазыктык куугунтуктоону жүргүзүүдө коррупциялык тобокелчиликтерди азайтууга жана кызыкчылыктардын кагылышуусун болтурбоого багытталган. Прокуратура тарабынан жүргүзүлчү көзөмөл функцияларын төмөндөтүү же алып салуу максатын көздөбөйт. Аскер кызматкерлеринин ишин тергөө өзүндө калат", — деди Баетов.
Белгилей кетсек, 2021-жылы жаңы Конституция кабыл алынгандан кийин президент тарабынан сунушталып, Башкы прокуратура кылмыш ишин тергөө укугуна ээ болгон эле.
Көпчүлүк депутаттар эки жылга жетпей мыйзамды кайра өзгөртүүгө киргизишкенин сынга алышты. Эл өкүлү Дастан Бекешев президенттин алдында билимдүү юристтер бар экенинен шек санады.
"Ал юристтер "сиз эки жыл мурун тапшырма берип, анан ушул мыйзамды бекиткенсиз. Бүгүн кайра башкача тапшырма болуп жатат, муну кандай кылабыз" деп айтышабы? Ушундай кеңештерди береби? Мурда башкы прокурор келип президент менен макулдашканын айтып, мыйзамды шашылыш кабыл алганбыз. Мен ошондо эле "туура эмес болуп калды" десем уккан эмес. Эми азыр ката кетиришкенин моюнга албай, реформанын негизинде өзгөртүп жатабыз дешүүдө. Жыл сайын реформа болбойт да", — деди Бекешев.
Ал эми башкы прокурордун орун басары Үмүткан Коңкубаева учурда алардын тергөөсүндө 933 кылмыш иши каралып жатканын билдирди. Жаңы мыйзам кабыл алынса, ал иштер тиешелүүлүгүнө жараша ИИМ менен УКМКга өткөрүп берилет.