БИШКЕК, 28-май — Sputnik. Садыр Жапаров бүгүн, 28-майда, чек арачыларды кесиптик майрамы менен куттуктады. Бул тууралуу президенттин маалымат кызматы кабарлады.
Өлкө башчы белгилегендей, чек ара коопсуздугун камсыздоо өлкөнүн аймактык бүтүндүгү менен көз карандысыздыгын сактоо тутумунда өзгөчө роль ойнойт. Бүгүнкү күндө Кыргызстандын улуттук кызыкчылыктарын коргоого багытталган мамлекеттик башкаруунун толук кандуу тармагы болуп саналат.
"Бул татаал механизмде алдыңкы орунду Чек ара кызматы: анын инфратүзүмү, техникалык каражаттары, курал-жарактары жана негизги бөлүгү — өздүк курам ээлейт. Кайсы мезгил болбосун өлкө тынчтыгын бузуп душман бастырып киргенде, чек арачылар алгачкы соккуну тосушат. Өткөн кылымдагы Улуу Ата Мекендик согуштун башталышында болобу, же Кыргызстан эгемендүүлүк алгандан берки бир канча жолку оор кагылышууларда болобу, чек арачылардын каармандыгы, эрдиги буга далил", — деген Жапаров.
Өлкө башчы чек арачылардан мекенчилдик сезимди, жогорку жоопкерчиликти, кесиптик чеберчиликти дайыма жогорулатып туруу, дене тарбия жана моралдык-психологиялык күжүрмөндүүлүк талап кылынарын айткан. Бул жаатта шарттар жакшырарына убада берген.
"Мамлекет мындан ары да Чек ара кызматынын аброюн көтөрүүгө, бул кызматтын сапатын жогорулатууга, мамлекеттин чегин ишенимдүү коргоого, кызмат өтөө шарттарын жакшыртууга, чек арачылардын социалдык жактан камсыз болушуна кам көрүүнү улантат", — деди Жапаров.
Президент чек ара кызматкерлерине жана ардагерлерге чың ден соолук, кажыбас кайрат жана албан-албан ийгиликтерди каалаган.