БИШКЕК, 28-май — Sputnik. Ленин шайлоо округунда Жогорку Кеңештин депутаттыгына талапкерлерге добуш берүү башталды.
Район боюнча добуш берүү үчүн 51 шайлоо тилкеси уюштурулган. Бүгүн эртең менен саат 8:00дө алардын баары ачылды.
Ленин округунда жалпысынан 124 908 шайлоочу бар, анын ичинен 43,77 пайызы эркектер, 56,23 пайызы аялдар.
Депутаттык мандат үчүн 30 талапкер ат салышууда. Алар тууралуу кенен маалымат БШКнын сайтында камтылган.
Эскерте кетсек, 2021-жылкы парламенттик шайлоодо Ленин округунан утуп чыккан депутат Жаныбек Абиров быйыл 12-мартта ГБРдин кызматкерин сабап салган. Бул боюнча кылмыш иши козголуп, башкы прокурор депутатты жоопко тартууга макулдук сурап Жогорку Кеңешке кайрылган. Көп өтпөй Абиров күнөөсүн моюндап, мандатын өз ыктыяры менен тапшырган. Ал эми жабырлануучу тарап менен элдешкени айтылды.
Ушуга байланыштуу Ленин округунда кайра шайлоо өтүп жатат.