БИШКЕК, 26-май — Sputnik. Бишкектеги "Батуми" кафесин буздуруу боюнча вице-мэр Нурдан Орунтаевге жана башка кызмат адамдарына кылмыш иши козголду. Бул туурасында УКМКнын маалымат кызматы билдирди.
Алар Кылмыш-жаза кодексинин 216-беренеси ("Башка бирөөнүн мүлкүн жок кылуу же бузуу") жана 337-беренеси ("Кызмат абалын кыянаттык менен пайдалануу") боюнча айыпталууда. Тергөөнүн жүрүшүндө Орунтаев жабырлануучу тарапка келтирилген зыяндын ордун толтуруп берүүгө милдеттендирилген. Кафени буздуруудан келтирилген чыгым 3 миллион сомдон ашары белгиленди.
Ошондой эле "Батуми" кафесинин негиздөөчүлөрү унаа токтотуучу жай үчүн ижарага берилген муниципалдык жерге имарат куруп алганы аныкталган.
УКМК төрагасы Камчыбек Ташиев вице-мэрге мындан ары кызмат адамы тарабынан жарандардын укуктарын жана кызыкчылыктарын бузган мыйзамсыз аракеттерге жол берилбестиги тууралуу айтылганын эскертти.
Белгилей кетсек, Орунтаев шаршемби күнү атайын техника менен барып кафени буздуруп, ичиндеги буюм-тайымдарды сыртка чыгартып салган. Ал кафе мыйзамсыз курулганын, бузуу боюнча алдын ала кабарлама берилсе тоготпой коюшканын айтууда.
Окуя болгон күндүн эртеси кафеге УКМК төрагасы Камчыбек Ташиев барып, эгер сүрдүрүү мыйзамсыз болсо күнөөлүүлөрдү жоопко тартууга тапшырма берген. Өз кезегинде жактоочу Орунтаевдин үстүнөн арыз жазганын билдирген.