БИШКЕК, 24-май — Sputnik. Билим берүү жана илим министри Каныбек Иманалиев жалпы республикалык тесттин маани-маңызы тууралуу айтып берди.
Бүгүн Жогорку Кеңештин айрым депутаттары ЖРТда мектеп предметтеринен сырткаркы суроолор берилип, жакшы окуган балдар да төмөнкү балл алып жатканына нааразы болушту. Алардын айтымында, мындан улам балдар кошумча курстарга барып даярданууга аргасыз.
Иманалиев советтик педагогика окуганды, жаттаганды, санаганды үйрөткөнүн эске салып, азыр дүйнөдө ошол үч көндүм тогузга жеткенин билдирди.
"Биз эмне үчүн 2007-2009-жылдары PISA окуучулардын билим жетишкендиктерин баалоонун эл аралык программасында эң акыркы орундарды алып калганбыз? Кыргызстандын окуучулары окуганды, санаганды билет, бирок логикалык ой жүгүртө албайт. Азыр Кытай 9 көндүмгө өттү, биз жок дегенде 5-7ге жете алсак PISA боюнча жакшы орундарды алабыз. ЖРТ сөзсүз түрдө керек, кээ бир суроолорун өнүктүрүү зарыл. Окуучунун масштабы кеңейиши шарт, ЖРТ ошонун бири. Болгону кээ бир окуучулар көнө албай жатат", — деди министр.
Ошондой эле ал окуучулар беш-алты вариантты түзө билгендей болушу керектигин кошумчалады. Мисал катары Америкада 7-класстар бизнес-долбоор жазып, 9-класстар дебаттарга катышарын белгиледи.
Министрдин орун басары Расул Абазбек уулу ЖРТда көбүнчө логикалык жана турмуштук тапшырмалар болорун белгиледи. Анын айтымында, 11-класстын бүтүрүүчүлөрү мектептеги билим берүүнүн сапаты начар болгондуктан натыйжа көрсөтө албай калат.