БИШКЕК, 24-май — Sputnik. Садыр Жапаров ЕАЭБде бизнес-акыйкатчы институтун түзүүнү сунуштады. Президент бул тууралуу Москвада өтүп жаткан II Евразиялык экономикалык форумда билдиргенин анын маалымат кызматы кабарлады.
Жапаровдун айтымында, институт бизнестин дараметин жогорулатуу жана анын кызыкчылыгын коргоо үчүн зарыл.
“Акыр-аягы мындай институт биримдиктин ички рыногундагы тоскоолдуктарды минималдаштырууга жана пайда болгон маселелерди сотко чейинки чечүү механизмин түзүүгө жардам берет”, — деди өлкө башчы.
Ошондой эле мамлекет башчысы Кыргызстандын биримдиктеги өзгөрүлбөс приоритети — бирикменин ички рыногундагы тоскоолдуктарды жоюуда Евразиялык экономикалык комиссиянын жана ЕАЭБ сотунун ролун күчөтүү экенин белгиледи.
“Бул институттар товарларды ташуудагы талаш-тартыштарды ыкчам чечүүгө жөндөмдүү, улуттуктан жогору турган иштиктүү органдар болууга тийиш. Бул үчүн алар мүчө-мамлекеттер тарабынан ЕАЭБдин укуктарын бузуу фактылары боюнча иликтөөлөрдү жүргүзүү, мындай бузууларды четтетүүнүн так мөөнөтүн белгилөө менен, ошондой эле ЕАЭБге мүчө-мамлекеттер биримдиктин алкагындагы чечимдерди аткарбагандыгы жөнүндө ЕАЭБ сотуна доо арыздарды берүү мүмкүнчүлүгүнө ээ болушу керек”, — деди президент.
Мындан тышкары, Жапаров ЕАЭБ экономикалык өнүгүүнүн өз алдынча жана эч кимге көз каранды эмес уюлуна айланып баратканын белгиледи. Президент биримдик тышкы экономикалык ишмердүүлүктүн катышуучуларынын керектөөлөрүн өз алдынча канааттандыра аларын кошумчалады.
КР лидери биримдик аймагында ар бир адам өзүн үйүндөгүдөй сезиши керектигин айтты.
“Бул үчүн алардын эркин жүрүүсүнө шарт түзүү, ишке орношууга, билим алууга, квалификациясын жогорулатууга, саламаттыкты сактоого жана спортко бирдей укуктарды камсыз кылуу зарыл”, — деди Жапаров.
Ал ошондой эле ЕАЭБдин улуттуктан жогору турган өнүктүрүү институтун түзүү керектигин айтты. Институт Россиянын Стратегиялык демилгелер агенттигинин мисалында интеграциялык долбоорлорду даярдоо, аналитикалык колдоо жана каржылоо функцияларын аткарат.
Евразия экономикалык форуму — ЕАЭБдин жыл сайын өтүүчү экономикалык иш-чарасы. Иш-чарага бийлик органдарынын, бизнес-коомчулуктун, эл аралык уюмдар менен ЖМКлардын 2,5 миңден ашык өкүлү катышат.
Өткөн жылы форум Кыргызстандын борбору Бишкекте уюштурулган.
Sputnik — ЕЭФ-2023түн маалыматтык өнөктөшү.