Коронавируска каршы ар кайсы өлкөлөрдүн вакциналары иштелип чыкты. Арасынан эң эффективдүүсү катары Кытайдыкын айтсак болот. Анткени алар вакцинаны вирустун толук түрүнөн жасап чыгышты. Тагыраак айтканда, алар SARS-CoV-2 вирусун адамдын организмине оору алып келбей турган абалга алып келип, анан эны эмдөө жолу менен киргизишти. Бул тууралуу Зуридин Нурматов Sputnik Кыргызстан радиосуна маек куруп жатып билдирди.
Анын айтымында, дүйнө жүзү боюнча 8 миллиарддан ашуун коронавируска каршы вакцина иштелип чыккан.
"Коронарвирустун вакциналары жалпысынан баары эле туруктуулугу менен медиктерди таң калтырды. Анткени илдеттин жеңил түрү менен ооруп айыккандарга салыштырмалуу эмдөө алган адамдарда антитело узак убакытка чейин жогорку көрсөткүчтө сакталып турду. Вакциналардын кайсы гана түрүн алышпасын, антитело дээрлик барында 99-100 пайыз пайда болуп жатты. Бирок окумуштуулар арасында бардык ойлоп табылгандардын ичинен Кытайдын коронавируска каршы вакцинасы эффективдүү деген божомол бар. Анткени алар вирусту толугу менен алып туруп вакцина жасашкан. Ал эми башка өлкөлөр вирустун оору чакырган гана бөлүгүн колдонушкан. Демек, бул ковид гендик инженерияга туш болуп, кайрадан адамдар арасында тараса башка вакциналарда ага каршы туруштук бере турган бөлүгү жок болуп калышы ыктымал дегенди түшүндүрөт. Мындан кооптонуунун кажети жок. Анткени илим азырынча коронавирус гендик инженерияга дуушар болот деп так айта албайт жана баштапкы вакциналар жаңы пайда болгон вирустук өзгөрүүдө деле тамыры бир вирустан чыгып жаткандыктан өзүнүн коргоочу функцияларын толук кандуу аткарышы мүмкүн деп божомолдойт", — деди Нурматов.
Окумуштуу коронавирустан эмдөө алып же ооруп айыгып антитело пайда болсо, ал иммундук эс тутумда өмүр бою сакталып каларын кошумчалады.