БИШКЕК, 18-май — Sputnik. Москва БУУнун Коопсуздук кеңешинде Украинанын аскерий чалгын кызматынын башчысы Кирилл Будановдун "орустарды кайда болбосун өлтүрүүнү уланта бериш керек" деген планы боюнча кат таратты. Бул туурасында Россиянын аталган уюмдагы өкүлчүлүгүнөн билдиришти.
"Украинанын аскер-чалгын кызматынын белгилүү болуп калган билдирүүсү боюнча катты расмий документ катары БУУнун Коопсуздук кеңешине таратып бердик", — деп айтышты миссиядан.
Документте Россиянын БУУдагы атайын өкүлү Василий Небензя Будановдун ойго келбеген төмөнкү сөздөрүн келтирген: "Биз орустарды өлтүрүп келгенбиз жана да Украина толук жеңмейин жердин кайсы бурчу болбосун аны уланта беребиз".
Дипломаттын айтымына, бул жек көрүүчүлүктүн мисалы жана русофобия, андан сырткары, улутка зомбулук көрсөтүүгө шыкактоо.
Катта украиналык ЖМКлардын бириндеги Дарья Дугина, Владлен Татарск жана Захар Прилепинден кийин кезекте ким турганы боюнча сурамжылоо болгону белгиленген.
Россиянын дипломатиялык миссиясынан Киевдин мындай кадамдары бери дегенде эле дискриминациянын бардык түрлөрүн түп-тамырынан жок кылуу боюнча Конвенциянын жоболорун бузарын белгилешкен.
Кийинчерээк БУУнун башкы катчысынын өкүлү Стефан Дюжаррик Будановдун айткандарына комментарий берип жатып, кырдаалды "тынчтандырууга" эмес, тескерисинче, ага "от жаккан" риторикадан алыс болууга чакырган. Ал БУУ кайсы гана жерде болбосун соттук териштирүүдөн сырткары аракеттерге, террорчулуктун бардык актыларына каршы турарын айткан. Мындай нерсени чын эле Украина чалгын башчысынын айтышы мүмкүн экендигине мурдагысындай ишене албай жатканын белгилеген.
Россиянын БУУдагы атайын өкүлчүлүгү уюмдун жетекчиси Будановдун айткандарына эч кандай реакция кылбай жаткандыгын билдирген.
Алар расмий өкүлдүн таң калычтуу мындай кадамы БУУ катчылыгынын кызматкеринин кесипкөйлүгү боюнча маселени жаратып, саясий жактан жан тарткандыгын билдирерин айтышкан.
Москва уюмдун жетекчилигин жана маалыматтык кызматын саясий баа берүүдө кош стандартты кармануудан алыс болууга жана россиялыктарды өлтүрүү боюнча ачыктан-ачык жасалган чакырыктарга реакция кылууга чакырды.
Кечээ Буданов Валерий Савчук менен болгон маегинде Киев бийлиги белгилүү россиялыктарды өлтүрүүгө катыштыгы бар экендигин айтып, бирок ысымдарын атаган эмес. Майдын башында да Буданов Киев "орустарды буга чейин өлтүргөнүн жана Украина толук жеңмейин жердин кайсы бурчу болбосун аны уланта беришерин" жар салган.
Кремль муну төбө чачты тик тургузган билдирүү деп атады. Россия президентинин маалымат катчысы Дмитрий Песков Киев режими адам өлтүрүүчүлүккө гана демөөрчү болбостон, анын уюштуруучусу, түрткү берүүчүсү жана аткаруучусу да экенин белгилеген.
Анын айтымында, мындай билдирүүлөр Владимир Путиндин атайын операцияны баштоо чечими туура экендигин бекемдеп турганын айткан.