БИШКЕК, 17-май — Sputnik. Дмитриевка айылында террорчуну кармоо аракети учурунда жаракат алган жоокерге операция жасалды, абалы туруктуу. Бул тууралуу Саламаттык сактоо министрлиги билдирди.
Маалыматка караганда, спецназдын кызматкери саат 10:45те Улуттук госпиталга жеткирилген. Анын сол бутунун санына ок тийип, сынып кеткен. Операция учурунда ок бутунан чыгарылып, сынган саны Хофман аппараты менен бекитилген. Бейтаптын операциядан кийинки абалы туруктуу деп бааланууда.
Эске салсак, бүгүн таңда Ысык-Ата районундагы Дмитриевка айылында террорчуну кармоо операциясы болуп, анда эки жоокердин жарадар болгону кабарланган. Бирине операция жасалса, экинчисине амбулатордук жардам көрсөтүлгөн.