Азыркы замандагы мамлекет Кыргызстандай болушу керек. Бардык мамлекеттер менен мамиле түз болуп, душман күтпөш кажет. Өзүнүкүн бербей, бирөөнүкүнө көз артпоо зарыл. Бул тууралуу Алмаз Акматалиев Sputnik Кыргызстан радиосунун эфиринде маек куруп жатып билдирди.
Анын айтымында, Россия менен Кыргызстандын ортосундагы соода-сатык толук рублге өтсө бизге пайдасы гана тиет.
"Көпчүлүк эл Садыр Жапаровдун Россия Федерациясына болгон сапарын 9-Майга карата майрамдык парадга катышууга эле барды деп кабыл алды. Бирок эки тараптын Тышкы иштер министрликтери муну расмий сапар деп сыпатташты. Президентти 7-8 министр коштоп барып конкреттүү документтерге кол коюлбаса дагы маанилүү билдирүүлөр жасалды. Ошондой эле өлкө башчынын Москвадагы Жеӊиш парадына барып катышышы да абдан маанилүү учур болду. Себеби бул совет эли үчүн өтө ыйык, ошону менен бирге татаал майрамдардын бири. Орус эли бул майрамды менчиктештирип алган эмес. Алар бул бүтүндөй совет элинин майрамы, Советтер Союузунун жеӊиши деп белгилеп келишет. Акыркы учурдагы геосаясий абалдан улам Улуу Жеӊиштин маани-маӊызын азайтканга аракет кылгандар четтен чыкты. Биз буга жол бербешибиз керек. Ал эми Садыр Жапаровдун Россияга болгон расмий сапары соода-экономикалык, инвестициялык жана маданий-гуманитардык кызматташууну кеңейтүүгө мүмкүнчүлүк берет. Алсак, Украинадагы окуяга байланыштуу эл аралык банктар Россиянын банктарына санкция киргизди. Кыргызстан менен Россиянын соода жүгүртүүсү үч миллиард долларга жетти деп жатабыз. Биздин соода-сатык эмне үчүн доллар, евро менен гана жүргүзүлүшү керек? Эки эгемен мамлекет ыӊгайына карап кайсы валютада соода алакасын түзөрүн өздөрү чечип алганы оң. Мындайча айтканда, соодада саясат болбошу зарыл. Бул сапарда да Кыргызстан россиялык каржы институттарынын өлкөдө болушун кубаттаары, тараптар банк жана финансы тармагында кызматташууну жана өз ара эсептешүүдө улуттук валюталарды колдонуу практикасын кеңейтери белгиленди", — деди Акматалиев.
Ал учурда Кыргызстандын Россия менен алакасын солгундатууга эч кандай негиз жок экенин кошумчалады.