БИШКЕК, 16-май — Sputnik. Ысык-Көлдө Royal Beach отели жайгашкан 8,19 гектар жерди менчикке мыйзамсыз берип коюшкан. Бул туурасында УКМКнын маалымат кызматынан кабарлашты.
Комитеттин билдиргенине караганда, 2015-жылы Ысык-Көл райондук соту Чок-Талдагы жерди менчикке берүүгө негиз болгон мыйзамсыз чечим чыгарган. Ал документте аянт эки гектарга азайтылып көрсөтүлгөн.
"Сот материалдык пайда көрүүнү көздөп, бир иш боюнча эки башка жер аянтын көрсөтүп мыйзамга каршы келген эки чечим чыгарып берген", — деп айтылат маалыматта.
Мындан улам мамлекетке 42 миллион сомдук зыян келгендигин айтышты.