БИШКЕК, 14-май — Sputnik. Бишкектеги түнкү клубдардын биринде бейбаштык кылып асманга ок чыгарган киши кармалды. Бул туурасында Октябрь райондук милициянын маалымат кызматы кабарлады.
Социалдык тармакка тараган кадрдан ал тапанчасын көтөрүп алып, жанындагыларга "эмне болду, э?" деп жатканын көрүүгө болот.
Милициянын билдирүүсү боюнча, 14-майга караган түнү саат 03:06 чамасында Асанбай кичи районундагы түнкү клубда бир киши курал көтөрүп асманга атып жатканы боюнча чакыруу түшкөн.
Шектүү
© Фото / пресс-служба УВД Октябрьского района
Ыкчам топ барып, 34 жаштагы А.С. аттуу жаранды кармап Тергөө кызматына алып келген. Ага карата Кылмыш-жаза кодексинин 280-беренеси ("Бейбаштык") менен кылмыш иши козголуп, Бишкек ШИИБдин убактылуу кармоочу жайына киргизилген.
Учурда иликтөө жүрүп жатат, шектүүдөн желим ок атуучу МР-471 тапанча алынып, тийиштүү экспертизалар дайындалды.