БИШКЕК, 12-май — Sputnik. Президент Садыр Жапаров Бишкек шаарындагы Ленин районундагы шайлоо округунан Жогорку Кеңештин депутаттыгына талапкерлер менен жолугушту. Бул тууралуу президенттин маалымат катчысы Эрбол Султанбаев билдирди.
Анда айтылгандай, жолугушуу ачык диалог, суроо-жооп форматында өттү. Садыр Жапаров коомдо "бир округдан бир депутатты шайлоо болуп жатса президенттин талапкерлер менен жолугушуусу туурабы" деген ар кандай суроо туулушу мүмкүн экендигин белгилеген. Ал кандай гана шайлоо процесси болбосун, ал чоң саясий окуя болуп саналарын айтты.
"Эгемендүү Кыргызстандын тарыхында шайлоолордун жыйынтыгына бир нече жолу нааразычылыктар жаралып, элдин талаптары эске алынбай, үч жолку төңкөрүштү башыбыздан кечирдик. Эң башкысы — элдин бийликке болгон ишенимине доо кетти. Ошондуктан биз өткөндөн сабак алып, ар бир шайлоого терең маани берип, аны ачык-айкын өткөрүшүбүз керек", — деген Жапаров.
Өлкө башчысы талапкерлерге БШКнын башчысы менен бирге экскурсия жасап, шайлоочуларды идентификациялоонун жогорку IT-технологиялар колдонулган жаңы системасы кандай иштээрин өз көзү менен көрүп чыгууну сунуштаган.
Ал КР мыйзамдарын өзгөртүү жолу менен эл аралык стандарттарга ылайык эркин жана демократиялык шайлоолорду өткөрүү үчүн укуктук шарттар түзүлгөнүн билдирген. Убагында айрым талапкерлерге ар кандай артыкчылыктар берилип, "президенттен бата алыптыр", "бийликтин кишиси экен" деген түшүнүктөр болгонун да эске салган. Айрым талапкерлер үчүн административдик машина иштеп, мамлекеттик жана социалдык тармактын кызматкерлери үгүт иштерине курал катары колдонулганын, ал эми айрым талапкерлерге бийлик тарабынан, тескерисинче, бут тосуулар болуп келгенин белгилеген.
"Бүгүнкү күндө мындай адилетсиз, мыйзамсыз аракеттерге таптакыр жол жок. Бийлик тарабынан шайлоолорго ар кандай ыкма менен аралашууга жол бербейбиз. Бүгүнкү жолугушууга укук коргоо органдарынын жетекчилери, Бишкек шаарынын мэри жана башка жетекчилер келишти. Сиздердин алдыңыздарда шайлоону өткөрүүгө тиешелүү жетекчилердин баарына эскертемин. Бир да мамлекеттик жана муниципалдык кызматкер үгүт иштерине аралашпасын", — деген мамлекет башчысы.
Ошону менен бирге Жапаров шайлоону таза өткөрүү жеке эле мамлекеттик бийликтин милдети эмес, шайлоонун акыйкат жана ачык өтүшүнө ар бири өз салымын кошушу керектигин айткан. Президент талапкерлерди мыйзамдуулукту так сактоого жана шайлоочулардын добушун сатып алууга, бюллетендерди сүрөткө тартып шайлоочулардан отчет алуу, добуш берүүнүн купуялуулугун бузуу, шайлоочуларды шайлоо тилкелерине ташып келүүгө жол бербөөгө чакырган.