БИШКЕК, 12-май — Sputnik. Кыргыз футбол союзу Катарда өтө турган Азия кубогу — 2023 оюндарындагы Кыргызстандын командасынын тайпалык оюндагы расписаниесин жарыялады.
Биринчи матч, Таиланд командасы менен беттеш 2024-жылдын 16-январында саат 20:30да (Бишкек убактысы боюнча) Дохадагы Абдулла бин Халиф стадионунда башталат.
Экинчи оюн 21-январга (саат 23:30) белгиленген. Ата мекендик команда сауд арабиялыктар менен кез келет. Беттеш Эль-Хаурдагы "Эльбайт" стадионунда өтөт.
Оман менен оюн 25-январга белгиленди (саат 21:00). Футболчулар Дохадагы "Эль-Тумам" аренасынан таймашат.
1/8 финалдык оюндар 28-январда старт алып, 31-январга чейин созулат. Чейрек финалдык беттеш 2-3-февралда, жарым финалдык беттеш 6-7-февралда, ал эми финал 10-февралда өтөт.
Турнирдин расписаниеси менен КФСнин https://t.me/kfu_kg/19687 Telegram-каналынан таанышууга болот.
Турнир Катарда 2024-жылдын 12-январынан 10-февралына чейин өтөт.
Алгач Азия кубогун 2023-жылдын жай айларында Кытайда өткөрүү пландалган. Бирок өлкө бийлиги COVID-19га байланыштуу чектөөлөрдөн улам турнирди уюштуруудан баш тарткан. Биринчилик Катарга өткөрүп берилген. Бул өлкөдө климат өтө ысык болгондуктан турнир келерки жылдын кыш айында өтөт.
Учурдагы чемпион Катардын командасы болуп саналат.