БИШКЕК, 11-май — Sputnik. Кыргызстандын Тышкы иштер министрлиги Россиянын миграциялык мыйзамында маанилүү өзгөрүүлөр болгонун кабарлады.
"РФтеги чет элдик жарандарды жана жарандыгы жокторду миграциялык каттоого алуу жөнүндөгү" федералдык мыйзамга 28-апрелде өзгөртүүлөр киргизилген. Бул Россия тарап менен жогорку деңгээлдеги сүйлөшүүлөрдүн жыйынтыгы болуп эсептелет.
2023-жылдын октябрь айынын соңунан тарта чет элдик жарандар РФке өзүнүн жана жашы жете элек балдарынын убактылуу катталган жерине келгени тууралуу маалыматты миграциялык каттоо органдарына электрондук формада билдире алат.
Билдирмени өз алдынча жөнөтүү үчүн жарандар менен үйдүн ээсине төмөнкүлөр керек:
"Мамлекеттик жана муниципалдык кызматтардын бирдиктүү порталында" жеке кабинет ачуу;
"Мамлекеттик жана муниципалдык кызматтарды электрондук формада көрсөтүү үчүн колдонулган бирдиктүү идентификация жана аутентификация" системасына катталуу.
Батирди ижарага алуу жөнүндө келишим түзүүдө жарандар үй ээсинин кошумча макулдугусуз эле өз алдынча электрондук билдирме жөнөтө алышат (барып же электрондук формада).