БИШКЕК, 9-май — Sputnik. Батыш мамлекеттери мындан ары өздөрүнүн эрежелерин орнотуу үчүн салттуу баалуулуктарды жок кылуу максатында чатак менен төңкөрүштөрдү козутуп жатканын Россия лидери Владимир Путин айтты.
РФ президенти Улуу Жеңиштин 78 жылдыгына карата өтүп жаткан Кызыл аянттагы параддын алдында сүйлөп жатып, бул мындай карай келгенде талап-тоноо жана өкүмзордук экенин белгиледи.
"Артыкчылык кылам деген ар бир идеология табияты боюнча жийиркенерлик, кылмыштуу жана өлүм алып келген мүнөзгө ээ. Анткен менен Батыштагы глобалисттик элита мурдагысындай эле өзгөчөмүн деген тейде коомчулукту бөлүп-жарып, элди ууландырууну улантып, кандуу чатактарды жана төңкөрүштөрдү козутуп келет. Русофобиянын, агрессиялуу улутчулдуктун үрөнүн сээп, адамды адам кылган үй-бүлөлүк салттуу баалуулуктарды жок кылууда", — деди Путин.
Мунун баары "элге өзүнүн ойлогондорун, эрежелерин андан ары таңуулоо, үңүлүп карай келгенде талап-тоноону, өкүмзордукту жана басым жасоону улантуу үчүн" жасалууда.
"Алар дүйнөгө үстөмдүк кылуу жөнүндөгү нацисттердин акыл-эссиз дооматы эмнеге алып келгенин, бул кесепеттүү балээнин таш-талканын ким чыгаргандыгын, өз жери үчүн ким дубал болуп туруп бергенин, Европа элдеринин боштондукка чыгышы үчүн ким кан-жанын аябагандыгын унутуп калышты окшойт", — деп эске салды Путин.
Батыш эгемендүүлүккө көз артып, кол созуп турганын кошумчалаган.
"Алардын максаты — биздин өлкөнүн урап, жок болушу, дүйнөлүк экинчи согуштун жыйынтыгын сызып салуу, эл аралык укук менен глобалдуу коопсуздук системасын таптакыр талкалоо, өнүгүүнүн кайсы гана суверендүү борбору болбосун муунтуп, жок кылуу", — деген Путин.