БИШКЕК, 8-май — Sputnik. Үй жумуштары көптөгөн кыз-келиндерге жага бербеси баарыбызга белгилүү. Бирок андан ырахат алып, чаң соргуч же майлык кармап турган ирмемдерден дагы пайда табуунун жол-жобосун психолог Наталья Козлова айтып берди. Адистин пикирин "Доктор Питер" басылмасы жазды.
"Чаң сүртүү, идиш жуумай, чачылган буюм-тайымдарды чогултмай сыяктуу нерселер күндө жасалгандыктан тажатма, жагымсыз иш экени анык. Бирок адам баласы бул нерседен эч жакка качып кутула албайт. Бул тиричиликтин маанилүү бир бөлүгү. Чындыгында үй жумуштарынын пайдалуу жактары көп. Биз аларды көрө билишибиз керек", — деди Козлова.
Андан соң психолог пайда алып келчү 5 ыкманы тизмектеп берди:
Терс эмоциялардан арылуунун эң сонун жолу
Күйөөңүз, балдарыңыз же жетекчилик кыжырыңызды келтирген учурда үй жыйнап көрсөңүз керек. Бөлмөлөр кантип таптаза болуп калганын өзүңүз билбей каласыз. Ал ортодо жиниңиз тарап, жеңилдеп калганыңызды да сезесиз.
Жаңы нерсеге умтулуу
Ар бир адам жашоосунда жаңы, жагымдуу нерсе күткөндө эскиден арылгысы келип калат. Бул учурда үй жыйноо абдан эффективдүү. Керексиз, бирок ыргытып жиберүүгө кол барбай жүргөн акыр-чикирден арылып аласыз.
Тазалык — өзүңө кам көрүү
Өзүн сыйлаган ар бир адам таза, иреттүү жайда жашагысы келет. Бул нерсе ден соолукка дагы бир топ пайдалуу. Андыктан үй иштерин тажатма жумуш эмес, өзүнө кам көрүү катары кабыл алуу зарыл.
Үй жумуштары баарыбыздын башыбызды кошот
Үй жумуштарын бир гана аял киши жасашы керек деп эч жерде жазылган эмес. Ага колдон келишинче, үй кожоюну, бала-чака дагы кол кабыш кылганы туура. Өзүнүн ал-күчүнө жараша иштерди бөлүштүрүп алып, баары чогуу кылган жумуш үй-бүлөнүн ынтымагын бекемдейт. Анын үстүнө өз колу менен тазалаган жерге балдар кылдат мамиле кылып калышат.
Жагымдуу маанай
Такыр эле үй жыйнагыңыз келбей жатса, дүкөнгө чыгып, көптөн бери жегиңиз келип жүргөн тамак-аш же бөлмөгө гүл, жыттуу шам сыяктуу майда-чүйдө сатып алсаңыз болот. Ишенип коюңуз, сиз таза ашканада отуруп, тамактанып же көз жоосун алган гүлдү чаңы жок айнекке койгуңуз келет. Ошентип үй кантип жыйналып калганын сезбей да каласыз.