БИШКЕК, 8-май — Sputnik. Өзбекстандын президенти Шавкат Мирзиёев өлкөдө мөөнөтүнөн мурда президенттик шайлоо өткөрүү боюнча жарлыкка кол койгонун РИА Новости жазды.
Буга чейин ал өлкө башчысына мөөнөтүнөн мурда президенттик шайлоону жарыялоого жол берген конституциялык мыйзамга кол койгон. Бул негизги мыйзамга мамлекет башчысынын ыйгарым укуктарын беш жылдан жети жылга чейин узарткан өзгөртүүлөрдү киргизүүдөн кийинки биринчи президенттик шайлоо болот. Өлкөнүн Баш мыйзамы боюнча учурдагы президент Шавкат Мирзиёев шайлоого кайрадан катыша алат.
"Жаңыланган конституциянын 128-беренесиндеги өлкө президентине берилген ыйгарым укуктардан пайдаланып мен экинчи маанилүү жарлыкка кол койдум. Ага ылайык, биздин өлкөдө президенттик шайлоо мөөнөтүнөн мурда өткөрүлөт", — деген ал парламент, саясий партиялардын башчылары, сот органдарынын жана аткаруу бийлигинин жетекчилери, коомчулук өкүлдөрү менен болгон жолугушуусунда.
Шавкат Мирзиёев өлкө башчылыгына 2016-жылдын декабрь айында Өзбекстандын биринчи президенти Ислам Каримов каза болгондон үч ай өтүп кезексиз шайлоодо келген. Ислам Каримов 1989-жылдан баштап президенттик кызматты ээлеген. 2021-жылдын октябрь айында Мирзиёев шайлоочулардын 80,12 пайыз добушуна ээ болуп, кайрадан президенттик кызматка киришкен.