БИШКЕК, 4-май — Sputnik. Татарстандын борборунда "Россия — Ислам дүйнөсү: KazanForum 2023" аталышындагы ХIV эл аралык экономикалык форум болот. Бул тууралуу форумдун маалымат кызматы кабарлады.
Ири иш-чара 18-20-май күндөрү "Казань Экспо" эл аралык көргөзмө борборунда болот. Бул форум Россия менен ислам дүйнөсүндөгү мамлекеттердин негизги кызматташтык аянтчасы болуп саналат.
Анын максаты — РФтин аймактары менен Ислам кызматташтык уюму өлкөлөрүнүн (57 мамлекет кирет) ортосундагы соода-экономикалык, илимий-техникалык, билим берүү, социалдык жана маданий байланыштарды чыңдоо.
"2022-жылы KazanForum бир аянтчага эл аралык уюмдардын, мамлекеттик органдардын, каржы институттарынын миңдеген өкүлдөрүн, ошондой эле парламент депутаттарын, алдыңкы инвесторлорду жана ишкерлерди, россиялык жана 64 мамлекеттен келген компаниялардын топ-менеджерлерин, 35 мамлекеттин дипломатиялык миссиялардын өкүлдөрүн чогултту", — деп билдирди уюштуруучулар.
Бул жылы форумдун алкагында 200дөй иш-чара жана 140 тематикалык сессия күтүлүп жатат.
Форумдун программасына исламдык каржылоо жана адал индустриясы, эл аралык кызматташтык, логистика, транспорт, өнөр жай, туруктуу өнүгүү жана ESG, IT технологиялар, инновациялар жана инвестициялар, жаштардын бизнеси, чакан жана орто бизнес, аялдардын көз карашы, билим берүү, медицина, спорт жана башкалар камтылган.
Катышуучулар сынамык долбоорду башка аймактарга жайылтуу мүмкүнчүлүктөрүн, ошондой эле Россиядагы адал сертификаттарын берген органдарын каттоонун бирдиктүү системасына өтүүнү талкуулашат.
ЖМК өкүлдөрү үчүн кеңири медиа-сессия өткөрүлөт, ага Ислам кызматташтык уюму өлкөлөрүнүн жана РФтин жалпыга маалымдоо каражаттарынын жетекчилери катышат. Ошондой эле Россиянын бир нече мамлекет менен конференциялары пландаштырылган.
Форум Россиянын жана ислам дүйнөсүнүн ишкерлерине финансылык жана технологиялык өнөктөштөрдү табууга, жаңы рынокторго чыгууга жана инвестиция тартууга жардам берет.