Дүйнөлүк эпостордун эл аралык VII фестивалына быйыл 30дан ашык өлкөдөн катышуучулар келет. Бул тууралуу Венера Өмүрбек кызы Sputnik Кыргызстан радиосунун эфиринде маек куруп жатып билдирди.
Анын айтымында, аталган иш-чара быйыл эки багытта өтмөкчү.
"Маданият, маалымат, спорт жана жаштар саясаты министрлиги уюштуруп жаткан Дүйнөлүк эпостордун эл аралык VII фестивалы бул жылы илимий жана маданий багытта өтөт. Иш-чарага катышууну каалагандар 17-21-май күндөрү ордолуу Ош шаарына келсе болот. Азыркы кезде 30дан ашык өлкөдөн катышуучулардын келери күтүлүп жатат. Эл аралык фестиваль ар кандай конкурстар менен коштолмокчу. Мисалы, "Мыкты Боз үй" аттуу кароо-сынак аркылуу өлкөбүздөгү мыкты боз үй аныкталмакчы. Максаты — ата-бабаларыбыздан калган тарыхыбызды жана мурастарыбызды жаштарга өткөрүп берүү", — деди Өмүрбек кызы.
Ал аталган фестивалдын эң башкы колдоочусу президент Садыр Жапаров экенин кошумчалады.