БИШКЕК, 3-май — Sputnik. Жогорку Кеңеш акыйкатчы Атыр Абдрахматованы мөөнөтүнөн мурда отставкага кетирди.
Аны кызматтан алууну "Ата-Журт Кыргызстан" фракциясы сунуштап, Конституциялык мыйзамдар, мамлекеттик түзүлүш, сот-укук маселелери жана Жогорку Кеңештин регламенти боюнча комитети колдогон.
Ал эми бүгүн жалпы жыйында Абдрахматованы жумуштан бошотуу сунушуна 50 депутат "макул", бешөө "каршы" добушун берди. Натыйжада көпчүлүк добуш менен сунуш өттү.
Депутат Адахан Мадумаров эмне үчүн мөөнөтүнөн мурда отставкага кетирүү маселеси көтөрүлгөнүн сурады.
"Ата-Журт Кыргызстан" фракциясынын лидери Бактыбек Сыдыков жети айдан бери акыйкатчынын орун басары жоктугун, жалпы штатынын саны 91 болсо, 22 кызматтык орун бош турганын айтты.
"Бул деген Акыйкатчы институту иштебей жатат дегенди түшүндүрөт. Анын үстүнө 30дай кызматкери митингге чыгып, акыйкатчыны кетирип бергиле деп суранып жатат. Эмгек жамаатынын 60 пайызы акыйкатчы иштебей жатканын айтууда. Мына ошонун баары негиз болуп берди. Эң башкысы орун басарын дайындабаганы болду", — деди Сыдыков.
Ал эми фракциянын мүчөсү Кундузбек Сулайманов иштебей, популизм менен алектенген кызматкерлерге орун жоктугун билдирди.