БИШКЕК, 2-май. — Sputnik. Президенттин администрациясы туристтик сезондун алдында кыргызстандыктардан жана анын ичинде ЖМКлардан негативдүү маалыматтарды таратпоону суранды.
Мамлекет башчынын маалымат кызматынын жетекчиси Дайыр Орунбеков туризм үчүн өлкөдөгү коопсуздук дагы эң маанилүү экенин айтты.
"Алдыңкы айларда туристтик сезон башталат. Андыктан негативдүү маалыматтарды, туристтерди чочулаткан жаңылыктарды көп таратпай турсак. Нарында мас болуп алып жаш баланы зордуктап өлтүргөн, Таласта мал базардагы жапайычылык жазалоо деген сяктуу көрүнүштөр кесепетин тийгизет. Аны болсо биз баарыбыз жарышып таратып жатабыз. Жаманды жашырып, жакшыны ашыралычы. Мына ушундай окуядан кийин Таласка, Нарынга бирөө келеби?! Туризм өнүккөн башка өлкөлөрдө деле кылмыш, кырсыктар болот, бирок алар жарыялап, өз мамлекетинин кадыр-баркын төмөндөтпөйт", — деп жазды Орунбеков.
Ал мүмкүн болсо жагымдуу маалыматтарды чет тилдерде жарыялап, туристтерди кызыктырса пайдалуу болмок деген пикирин айтууда.
"Кырсык, кылмыштарды зарылчылык болуп баратса кыргыз тилинде, майда шрифт менен жаңылыктын эң арткы бөлүгүнө жазсак. Дегеле жазбай, таратпай койсок деле мүйүз чыгып кетпейт. Кырсык менен кылмышты алдын алуучу, кесепети менен күрөшүүчү тиешелүү тармактарыбыз деле кемчилиги болсо да, кудайга шүгүр, иштеп жатышат. Албетте, бул пикирге айрымдар кошулбашы мүмкүн. Биз эркин өлкөдө жашайбыз, ар бириңиздердин өз пикириңиздер бар. Айрыкча соцтармактарда бирдеме десең эле бөйрөктөн шыйрак чыгарчуларыбыз да көп. Эркин медиалардын көз карашы, принциптери, пикирлери да ар кыл болушу мүмкүн. Бирок, урматтуу мекендештер, көз караштарыбыз окшош болбосо дагы мамлекеттин имиджин көтөрө турган маселеде бирдиктүү болсок", — деп кайрылды маалымат катчы.
Ошондой эле ал ЖМКлар окурман топтоо үчүн кырсык, кылмыш, агрессия аралашкан маалыматтарды таратышат деп эсептейт. Ал эми кээ бир блогербиз дегендер мамлекетибиздин репутациясын түшүрө турган маалыматтар менен окурман чогултуп, сенсация жаратып, элдин көңүлүн буруу, катталуучу чогултуу деген жаман адат да таап алышкан деген оюн билдирди. Орунбеков ушундай илдеттерден арылууга чакырган.