БИШКЕК, 28-апр. — Sputnik. Кыргызстанда улуттук валютанын жаңы үлгүдөгү бешинчи сериясы чыгарылат. Бул туурасында Улуттук банктын төрагасынын орун басары Кайып Куленбаев маалымат жыйында билдирди.
Кыргызстанда улуттук валютанын жаңы үлгүдөгү бешинчи сериясы чыгарылат
© Фото / пресс-служба НБ КР
Анын айтымында, мындай иштер улуттук валютанын 30 жылдык мааракесине карата жасалууда.
"10-майдан тарта 200, 500 жана 1000 сом номиналындагы банкноталар 2023-жылдагы үлгү менен чыгарылат. Бул банкноталар улуттук валютанын бешинчи сериясын ачат. Жаңылары учурдагы сериялардын запасынын азайышына жараша этап-этабы менен толукталып турат", — деди Куленбаев.
Жаңы үлгүнү чыгаруу баскыч менен жасалат:
биринчи этап — 200, 500 жана 1000 сомдук номиналдагы купюралар;
экинчиси — 20, 50 жана 100 сомдук номинал;
үчүнчүсү — 5 сомдук номинал.
Мындай иштер улуттук валютанын 30 жылдык мааракесине карата жасалууда
© Фото / пресс-служба НБ КР
Купюралардын сүрөттөрү, түсү жана өлчөмү өзгөрүүсүз калат. Жаңы сериядагысында дизайны жаңыртылып, коргоо механизминин эффективдүү комплекси коюлган.
Деген менен бардык банкноталарды чыгарылган жылына карабай колдонуу мыйзамдуу болуп саналат.