БИШКЕК, 24-апр. — Sputnik. Баткен районунун Төрт-Гүл айыл аймагынын Чоң-Талаа айылында 225 орундуу Чоң-Талаа орто мектебинин курулушу башталды. Бул тууралуу президенттин аталган облустагы өкүлчүлүгү билдирди.
Капсула салуу аземине президенттин Баткендеги өкүлү Абдикарим Алимбаев, Жогорку Кеңештин депутаты Нурлан Ражабалиев, президенттин чек ара аймактарын калыбына келтирүү жана өнүктүрүү боюнча өкүлү Мамыржан Рахимов, АРИС уюмунун өкүлдөрү жана жергиликтүү жетекчилер, тургундар катышты.
Мектеп үчүн айыл өкмөт 1,4 гектар жер бөлүп берген.
Имарат эки кабаттан турат, курулуш мөөнөтү 2023-жылдын апрель-август айлары деп белгиленген. Тендердик баасы — 83,2 миллион сом.
Эскерте кетсек, былтыр чек арадагы куралдуу жаңжалда мектептин 2021-жылы курулуп пайдаланууга берилген биринчи окуу корпусунун имараты талкаланып, калган үч корпусу да жабыркаган.
Аталган мектеп Дүйнөлүк банктын каржылоосу менен АРИС уюму тарабынан курулуучу, куралдуу жаңжал учурунда жабыркаган 15 социалдык объектинин катарына кирди.