БИШКЕК, 17-апр. — Sputnik. Санитардык-эпидемиологиялык корутундуларды мыйзамсыз берип, пара алып турган деген шек менен төрт кызматкер кармалды. Бул туурасында УКМКнын маалымат кызматы кабарлады.
Билдирүүгө ылайык, Ооруларды алдын алуу жана санитардык-эпидемиологиялык көзөмөл департаментинин санитардык-эпидемиологиялык экспертиза бөлүмүнүн башчысы А.Л.О. туруктуу коррупциялык схема уюштурган. Ал Кыргызстанга товарларды жана продукцияларды ташып келүү үчүн Санэпид корутундуларын мыйзамсыз берип келген.
"А.Л.О. жооптуу кызматкерлери менен сүйлөшүп алып зарыл жол-жоболорду сактабастан жана тиешелүү экспертизаларды жүргүзбөстөн кыска мөөнөттө бажы брокерлерине санитардык-эпидемиологиялык корутундуларды берип жүргөнү аныкталды. Ал — продукциянын коопсуздугун тастыктаган эксперттик баалоо жүргүзүлгөн, товарларды ташып келүүгө жана сатууга уруксат берген документ. Мындан тышкары, сертификацияланууга тийиш болгон жүздөгөн товарга корутунду берүү үчүн пара алган ондогон факт катталды", — деп айтылат маалыматта.
Ошондой эле УКМК шектүү А.Л.О. жумуш ордуна жумасына бир жолу чогултулган акчадан өз үлүшүн алып кетүү үчүн гана келип турганын белгиледи.
Натыйжада Санитардык-эпидемиологиялык экспертиза бөлүмүнүн төрт кызматкери кармалып, Бишкек шаардык №1 тергөө абагына киргизилди. Учурда коррупциялык схемага тиешеси бар башка адамдарды аныктоо боюнча иштер жүрүп жатат. УКМК Саламаттык сактоо министрлигинин жетекчилигинен да күмөн саноодо.