БИШКЕК, 16-апр. — Sputnik. Россия менен Сауд Арабиясынын мунай альянсы АКШнын учурдагы президенти Жо Байдендин 2024-жылы кайра шайланышына тоскоолдук жаратышы мүмкүн. Бул тууралуу Bloomberg жазганын РИА Новости кабарлады.
Авторлор 2020-жылы АКШ ОПЕК мүчөлөрүнүн ортосундагы баа чырында "тынчтыкты орнотуучу" болсо, азыр альянс үчүн бутага айланганын белгилешкен.
"Россия-сауд мунай альянсы Америка экономикасын бир топ кыйратып, керек болсо президент Жо Байдендин шайлоо кампаниясына кедергисин тийгизиши толук ыктымал", — деп айтылат макалада.
Эскерте кетсек, ОПЕК+ нефть казуунун көлөмүн кыскартууну чечкен. Бул — Байден өткөн жылдын жай айларында Сауд Арабиясына өндүрүштү көбөйтүү үчүн барып келгенден кийин экинчи ирет жасалып жаткан кадам. Материалдын авторлору мындай чечим көп нерсенин башталышы гана деген пикирде.
Алсак, бүгүнкү күндө Эр-Рияд нефть казуунун көлөмүн Россия менен макулдашууда, Кытайдын ортомчулугу менен региондогу атаандашы деп эсептелген Иран менен мамилесин кыйла оңоп алды. Вашингтон мунун баарына сырттан гана көз салып турууга аргасыз.
"Башкача айтканда, Батыштын нефть картелине тийгизген таасири өтө эле төмөнкү деңгээлде. Акыркы он жылдыктарда мындай болгон эмес", — деп айтылат макалада.
Аналитиктердин айтымында, быйыл жана кийинки жылы нефтинин баррели орточо 85-90 доллар болот. Муну менен бирге Bloomberg алдындагы моделдөөнүн SHOK программасы 2024-жылы сунуштун кыскарышы нефтинин баасын 120 долларга чыгарарын божомолдоодо, натыйжада АКШда жыл аягына чейин инфляция төрт пайызга чукулдайт.
"Май куюучу жайлардагы баа добуш берүүгө бараткан элдин Байденге каршы добуш берүүсүн шарттайт. Азырынча дүйнөдөгү эң маанилүү товарга бааны АКШга тилектеш болбогон мамлекет бекитип жатат", — дешти авторлор.