БИШКЕК, 14-апр. — Sputnik. Кене энцефалити борбордук нерв системасын жабырката турган курч кармоочу вирустук оору. Ал адамга кене чакканда анын шилекейи аркылуу жугат. Кооптуу илдеттен коргонуу жолдорун Ооруларды алдын алуу жана мамлекеттик санитардык-эпидемиологиялык көзөмөлдөө департаменти түшүндүрүп берди.
Мекеменин билдирүүсүнө ылайык, кене энцефалитине жаш курагына, жынысына карабай баары дуушар болушу мүмкүн. Өзгөчө токойчулар, геологдор, унаа жана темир жолдорун, нефть жана газ өткөргүчтөрүн куруучулар, электр өткөргүчтөрдү орнотуп иштегендер, топографтар, аңчылар жана туристтердин чалдыгуу коркунучу чоң. Шаар тургундары калаанын четине эс алууга барганда, бак-дарактуу парктарда, огороддордо жүрүп аны жуктурушу мүмкүн. Оору кене көбөйгөн жаз-күз мезгилдеринде (апрель-сентябрда) күч алат. Оору жукканы демейде кене чаккан күндөн 7-14 күн өтүп билинет, айрым учурда 1 күндө, кээде 60 күндөн кийин билинип калышы мүмкүн.
Вирустук кене энцефалитинен кантип сактана алабыз?
Кене көп деп болжолдонгон жерлерге жакасы, жеңи жабылган атайын костюмдарды кийип алса болот. Мындай жайларда жеңи узун кийим кийүү керек, үстүңкү кийимди сөзсүз шымдап, шымдын багалегин байпактын ичине киргизүү менен кенеден сактанууга мүмкүн. Башка жоолук, шарф оронуп алуу сунушталат.
Кенеден атайын каражаттардын жардамы менен да сактанууга болот.
Адам токойдо же кене бар жерде жүргөндө өзүнүн денесин, кийимдерин улам-улам карап турганы жакшы.