БИШКЕК, 14-апр. — Sputnik. Бишкектин жаңы конуштарында жашаган, медициналык уюмдарда каттоодо турбаган ички мигранттарды (балдарды жана чоңдорду) профилактикалык эмдөө үчүн көчмө мобилдик клиника уюштурулду. Бул тууралуу Саламаттык сактоо министрлиги билдирди.
Иш-чара 11-апрелде башталган. Ал жугуштуу ооруларды алдын алуу жана эмдөөнүн жеткиликтүүлүгүн жогорулатуу максатында өткөрүлүп жатат.
"Көчмө мобилдик клиника №10 үй-бүлөлүк медицина борборунда ачылып, Дордой, Ак-Жар, Келечек конуштарынын тургундарын кабыл алууда. Андан ары мобилдик клиника шаардын башка калктуу конуштарында дагы уюштурулат", — деп билдирди министрлик.
Мындан тышкары, аталган кампаниянын алкагында ички мигранттар акысыз УЗИден өтүп, невропатолог, хирург, окулист, ЛОР дарыгери жана үй-бүлөлүк дарыгер сыяктуу адистердин кеңешин алса болот.