БИШКЕК, 13-апр. — Sputnik. Жогорку Кеңештин депутаты Тазабек Икрамов тажик тараптын кол салуусунда талкаланган үйлөрдүн курулушу бүтпөй, нааразычылыктар көп болуп жатканын билдирди.
Бүгүн парламентте чек ара кагылышында жабыркаган ишкерлердин насыяларын кечүү жөнүндө мыйзам долбоору каралган. Анда депутат курулуш маселесин көтөрдү.
"Баткенде күйүп кеткен үйлөрдүн баары март ичи курулуп бүтөрү айтылган. Бирок 24.kg сайтына ошол жактагы элдин кайрылуулары чыгып жатат. 60ка жакын үй бүтпөй калган дейт. Бүгүнкү күндө иштеген курулушчулардын акчасы берилбей, жадагалса кээ бир үйлөрдүн чатыры жабылбай турат. Нааразычылыктар көп болууда. Бул маселе кандай каралып жатат? Эмне себептен акча бөлүнбөй калды, 60ка жакын үй бүтпөй турабы?" — деп сурады Икрамов.
Финансы министринин орун басары Улукбек Календеров бийлик тараптан каражат өз убагында которулуп жатканын айтты.
Андан соң депутат канча акча которулганын, ар бир турак жай канчага бааланганын сурады эле, аткаминер жанында так маалымат жоктугун айтып жооп бере алган жок.
"Билбейсиз, билсеңиз дагы айткыңыз келбейт. Алмасбек Ахунжанович (президенттин парламенттеги өкүлү — ред.), көзөмөлгө алсаңыз. Үйлөр бүтпөй турат, кээ биринин сапаты начар экен", — деди Икрамов.
Алмасбек Абытов бул иш президенттин көзөмөлүндө экенин белгилеп, тактап кенен маалымат берүүнү убадалады.
Буга чейин өкмөт Баткенде талкаланган 418 үйдү курууга 1,3 миллиард сом бөлүнөрүн билдирген. Президент Садыр Жапаров жаңы жылга чейин баарын куруп бүткөрүүгө тапшырма берген. Бирок ал аткарылбай, кийинчерээк башкы подрядчы "Аманат курулуш инвест" компаниясы март айында иш толук соңуна чыгарын билдирген.