БИШКЕК, 10-апр. — Sputnik. Бишкекте көп кабаттуу турак үйлөрдүн курулушуна тийиштүү уруксат документтерди мыйзамсыз даярдап берген кызмат адамдарына иш козголду. Бул туурасында Башкы прокуратурадан кабарлашты.
Алешемдиктер Бишкек прокуратурасынын жер жана шаар куруу мыйзамдарынын аткарылышын текшергенден кийин чыккан.
Анда "Бишкек башкы архитектура", "Кадастрдын" Бишкек филиалынын жана Мамлекеттик экспертиза департаментинин жооптуу кызмат адамдары кызмат абалынан кыянаттык менен пайдаланганы маалым болгон. Алардын шаар куруу жана жер тилкеге болгон укук күбөлөндүрүүчү документтерге атайылап жалган маалыматтарды жана кадастрдык пландарына мыйзамсыз өзгөртүүлөрдү киргизишкендиги аныкталган.
Аталган кызмат адамдары "А.С" курулуш компаниясынын кызыкчыгын көздөп, Бишкек шаарынын түштүк бөлүгүндө жайгашкан көп кабаттуу турак үйлөрдүн курулушуна тийиштүү уруксат документтерди даярдап беришкени айтылды.
"Натыйжада курулуштун тыгыздыгынын, жашоо-тиричилик чөйрөсүнүн, инженердик-техникалык жана транспорттук инфраструктуранын сапатынын ченемдик деңгээли камсыз кылынбай, шаар куруу ишин башкаруу жана көзөмөлдөө чөйрөсүндө мамлекеттин кызыкчылыктарына зыян келтирилген", — деп билдирди прокуратуранын маалымат кызматы.
Текшерүүнүн жыйынтыгы менен шаардык прокуратура Кылмыш-жаза кодексинин 337-беренеси ("Кызмат абалынан кыянаттык менен пайдалануу") менен иш козгоп, тергөө иштерин баштаган.