БИШКЕК, 7-апр. — Sputnik. Президент Садыр Жапаров Апрель элдик революциясы боюнча кайрылуу жасап, аны маалымат кызматы таратты.
"Бүгүн Апрель элдик революциясына туура 13 жылдын жүзү болду. Кыргызстандын эгемендүүлүк жылдарындагы Аксы окуясы, Март, Апрель элдик революциялары жана акыркы Октябрь окуялары өлкө тарыхындагы саясий орчундуу окуялардан болуп калды. Азаттыкты туу тутуп, ар дайым калыстыкка умтулган өзгөчө касиетти көкүрөгүндө аздектеп алып жүргөн кыргыз эли бул окуяларда адилетсиз башкарууга караманча каршы болуп, чырмалышкан акыйкатсыз системаны алмаштырууга тикесинен тик турган", — деди Жапаров.
Ал, тилекке каршы, Апрель элдик революциясынын баасы өтө кымбатка туруп, 90дой эр-азаматтын каны менен келгенин белгиледи.
"Карапайым элдин, жумурай журттун азаттыгы үчүн күрөшкөн уулдарыбыздын жаркын элеси жүрөгүбүздө түбөлүккө жашай берет", — деп жазылат кайрылууда.
Жапаров тарыхтагы бул окуялардан алынуучу эң башкы сабак – адилет башкаруу менен элдин бакубат турмушун камсыз кылуу экендигин белгилеген.
"Биз Ата Мекени менен жамы журтунун камын жеп, кара башын канжыгага байлап өмүрүн арнаган атуулдарыбыздын ой-максат, тилектерин, кудай буюрса, орундатабыз", — деген президент.
Сөз соңунда мамлекет башчы өлкөнүн өсүп-өнүгүүсүн каалаган.
Белгилей кетсек, 2010-жылдагы апрель окуяларында 123 адам өмүрү менен кош айтышып, миңден ашуун киши жаракат алган. "Ала-Тоо" аянтында 87 адам көз жумса, 36сы кийин каза болгон.
7-апрель Кыргызстанда расмий түрдө Апрель революциясынын күнү болуп саналат.