БИШКЕК, 4-апр. — Sputnik. Саясатчылардын баары шайлоолор боюнча жаңы заман келгенин билип, сезиши керек. Бул туурасында президент Садыр Жапаров "Кабар" улуттук агенттигине берген мегинде билдирди.
Мамлекет башчы 28-майда өтө турган Ленин округу боюнча депутатты шайлоо маселесине токтолгон. Ал мындан ары талапкерлер президенттин батасын алат деген түшүнүк болбошу керектигин белгиледи.
"Мен эч бир талапкерди кабыл алган жокмун жана кабыл албайм дагы. Биз илгерки замандагы мындай жосундарды унутушубуз керек. Мурда президенттин батасын алмайын шайлоого аттанышпайт эле. Мындан ары кандай гана шайлоо болбосун, президент жана башка бийлик өкүлдөрү кийлигишпейт. Кимдир бирөөнү сүрөгөнгө жол бербейм. Биз жөн гана арбитр болуп беребиз. Көпчүлүк эл кимди тандаса, ошол талапкер депутат болот. Мындан кийин мурдагыдай айыл өкмөттөрдүн, мугалимдер менен медиктердин кайсы бир талапкерге иштешине дагы жол бербейбиз. Иштегенин билип калсак жоопко тартабыз", — деди Жапаров.
Ошондой эле ал каттоо бүткөндөн кийин БШК менен бирге талапкерлердин баарын чакырып чогулуш өткөрүү планы бар экенин айтты.
"Менин максатым – шайлоону таза, калыс, ачык өткөрүү. Талапкердин ишенимдүү адамын автоматташтырылган шайлоо системасына киргизип, көзөмөлдөтүү. Адатта утулуп калган талапкерлердин "...жасап коюшту, болбосо мен көп добуш алгам" деп дароо кыйкырып чыкмай адаты бар эмеспи. Адам баласы эсептен жаңылышыбыз мүмкүн, компьютер жаңылбайт. Кыскасы, мындан ары кандай гана шайлоо болбосун, таза өтүп турат, буюрса", — деди Жапаров.
Аны менен катар президент элдин добушун сатып алам деген бай талапкерлер дагы андай ойлорунан азыртан кайтышы керектигин эскертти.