Бүгүнкү күндө тартылып жаткан тасмалардын көбү коомго терс таасирин тийгизип жатат. Бул тууралуу Бусурман Одуракаев Sputnik Кыргызстан радиосунун эфиринде маек куруп жатып билдирди.
Анын айтымында, тарбиялык негизде тартылган картиналар азайып, убактылуу фильмдер жайнап кетти.
"Мурда бир кино тартыларда эң биринчи сценарийди карашчу. Көркөм кеңеш ар бир деталга дыкаттык менен көңүл коюп, талдап чыкчу. Коомго терс таасирин тийгизген же туура эмес жерлери бар болсо ал долбоорду ишке ашырууга уруксат берчү эмес. Жадагалса кийимдерибизге чейин маани берип, сценарий кынтыксыз болгондо гана тасманы тартууга каражат бөлүнчү. Ал эми бүгүнкү күндө болсо эч кандай кароодон өтпөй эле, бир көрүп койчу, башкача айтканда, убактылуу тасмалар тартылып жатат. Алардын коомго тийгизген таасири да, тилекке каршы, терс болууда. Фильм тартып жатканда этикага өзгөчө көңүл буруш керек. Бирок ошол эле кезде тарбиялык негизге басым жасап кино жараткан режиссёрлор да жок эмес. Мисалы, Руслан Акун, Айбек Дайырбеков, Азамат Шаршенбеков, Сапар Сайназаровду азыркы кездин мыкты режиссёрлору деп айта алам. Бул режиссёрлор коомду тарбиялаганга аракет кылышууда", — деди Одуракаев.
Ал анализ кылбай эле тасмаларды көрө берген жаш муундардын өсүп келе жатканы өкүнүчтүү экенин кошумчалады.