БИШКЕК, 3-апр. — Sputnik. Бишкек шаардык милициянын алдына активисттер митингге чыгып, жетекчиси Азамат Ногойбаевдин кызматтан кетишин талап кылышты.
Узаган жумада ШИИБдин башчысы түз эфирде жашы жете элек кыздар кишилер менен таанышып, өз ыктыяры менен жыныстык катнашка барып, анан дайынсыз жоголгон окуялар катталып жатканын билдирген. Анын пикири соцтармакта секелек кыздарга карата жасалган кылмыштарга өздөрүн айыптоо катары кабылданып, сынга кабылды. Мындан улам ИИМ Ногойбаевдин үстүнөн ички иликтөө жүргүзүп баштады.
Бүгүн калаанын башкы милиционери туура эмес сүйлөгөнүн моюндап, митингге чыккан активисттер менен журналисттердин алдында кечирим сурады.
"Борбор калаанын милициясы ар дайым алдын алуу иштерин жүргүзүп келет, бирок ата-энелер биринчи кезекте тарбия берүүгө катышышы керек. Мен эч качан жашы жете элек балдарды айыптагым келген эмес. Мен сиздерди сөзүмдү бурмалап жана башкача түшүндүрмө бербөөгө, элди адаштырбоого чакырам. Келгиле, реалист бололу. Мен биринчи кезекте Кыргызстандын жараны, 20 жылдан ашык тажрыйбасы бар офицер катары жасалган кылмыштарга жашы жете электерди айыптап, кылмыштуулукту калкаламак эмесмин", — деди Ногойбаев.
Ал тек гана туура эмес сөз колдонуп алганын айтууда.
"Мен эгер туура эмес сүйлөп алган болсом кечирим сурайм. Бирок тек гана "өздөрү" деген сөздү кошуп айтып алганым болду. Бирок кээ бир "жолдоштор" аны жаңылыктын темасына коюп, коомчулукка дүрбөлөң салышты. Дал ушул "өздөрү" деген сөз мага ушундай... Ооба мен "өздөрү" деген сөздү колдонгонум үчүн күнөөлүүмүн. Мен юрист катары минтип айтпашым керек эле. Азыркы учурда жашы жете элек балдарды коргоо боюнча бардык күч-аракеттер жумшалууда", — деди Ногойбаев.
Нааразычылык акциясына чыккан жарандар жолугушуудан кийин тарап кетишти. Ногойбаевдин отставкасын талап кылган митинг эртең Ички иштер министрлигинин алдында уланарын айтышты.