БИШКЕК, 2-апр. — Sputnik. Синоптиктер алдыдагы аптада Ысык-Көл, Жалал-Абад жана Чүй облустары боюнча аба ырайы кандай болорун айтып беришти.
Жалал-Абад облусунда
3-апрелде жана 4-апрелде түнкүсүн жаан-чачын күтүлбөйт. Чыгыштан соккон шамалдын ылдамдыгы секундасына 4-9 метрден 3-апрелде күндүз жана 4-апрелде түнкүсүн айрым жерлерде 15-20 метрге жетет.
5-апрелде күндүз жаан-чачын болбогону менен 6-7-апрелде күндүз айрым жерлерде өткүн өтүп, күн күркүрөшү, бийик тоолуу райондордо кар жаашы мүмкүн.
8-апрелде күн ачык болуп, 9-апрелде күндүз айрым жерлерде өткүн өтөт.
Апта ичинде абанын табы эң жогору дегенде +25…+27 градуска жетет. Анткен менен эртең түндө тоо этектеринде градус -1…-3кө чейин түшүп, үшүк жүрөт.
Ысык-Көл облусунда
3-6-апрелде жана 7-апрелде түнкүсүн жаан-чачын күтүлбөйт.
7-апрелде күндүз көпчүлүк аймактарда өткүн өтүп, күн күркүрөшү мүмкүн, бийик тоолуу райондордо кар жаайт.
8-9-апрелде күндүз айрым жерлерде өткүн өтөт.
Абанын табы 14…19 градуска чейин жылып, 3-апрель күнү түнкүсүн үшүк жүрөт. Анда температура Каракол шаарында -1…-3 градуска чейин төмөндөйт.
Чүй облусу
3-4-апрелде жаан-чачын күтүлбөйт. Чыгыштан соккон шамалдын ылдамдыгы секундасына 4-9 метрден 3-апрелде күндүз жана 4-апрелде түнкүсүн айрым жерлерде 15-20 метрге жетет.
5-9-апрелде күндүз айрым жерлерде өткүн өтүп, күн күркүрөйт. Бийик тоолуу райондордо жолдор тоңголок, тайгак болот.
Чүйдө жума ичинде күн +21…+23 градуска чейин жылыйт. 3-апрель түнү үшүк жүрөт (-1…-3).