БИШКЕК, 31-мар. — Sputnik. Саламаттык сактоо министрлигине караштуу "Кыргызфармация" мамлекеттик ишканасы түзүлгөндүгүн министрлер кабинети маалымдады.
Билдирмеде айтылгандай, ишкананын максаты жана милдети — мамлекеттик медициналык мекемелерди, калкты дары каражаттары, медициналык буюмдар менен жеткиликтүү баада камсыз кылуу боюнча мамлекеттик саясатты ишке ашыруу.
"Дары-дармектер рыногунда бүгүнкү күндө дагы, буга чейин да системалуу башкаруу болгон эмес. Бул өлкөдөгү эң татаал тармак бойдон калууда. Аталган ишкана дары-дармек менен камсыздоо жана бул багыттагы мамлекеттик программаларды ишке ашыруу үчүн жооптуу орган болушу керек. Мамлекеттик медициналык мекемелер үчүн сатып алынган дары-дармектердин жана медициналык буюмдардын наркын төмөндөтүү өндүрүүчүлөрдөн же дистрибьюторлордон түз жеткирүүдөн көз каранды болуп жатат. Бул саламаттыкты сактоо тармагындагы системалык реформалардын бир бөлүгү", — деп жазылат өкмөттүн билдирүүсүндө.
Мындан тышкары, ишкана дары-дармектерди жана субстанцияларды чыгаруучу заводдорду курууну каалаган инвесторлор менен иш алып барат. Анда ата мекендик өндүрүшчүлөргө колдоо көрсөтүлөрү, алар товарларын дүңүнөн сатууга кызыкдар болору белгиленген.