БИШКЕК, 31-мар. — Sputnik. Манхэттендин прокуратурасы АКШнын мурдагы президенти Дональд Трампты ишкер чөйрөдөгү 30дан ашык алдамчылыкка күнөөлөп жатат. Бул туурасында РИА Новости CNN телеканалына шилтеме берип кабарлады.
"Мурдагы президент Дональд Трамп ишкер чөйрөдөгү алдамчылыктын 30дан ашык эпизодуна айыпталууда. Бул туурасында Манхэттендин жогорку калыстарынын кине койгон документинде айтылат", — деп жазылган анда.
Конгресстин Эл өкүлдөр палатасынын спикери, республикачыл Кевин Маккарти Манхэттендин прокурору Элвин Брэгди кызмат абалынан кыянаттык менен пайдаланып жатат деген.
Трамптын 2024-жылда болуучу президенттик шайлоодо республикалык праймериздерде атаандашы болчу киши, Флориданын губернатору Рон Десантис иштин күмөндүү жагдайларын эске алуу менен штат Трамптын экстрадицияланышына көмөктөшпөстүгүн билдирген.
Экс-президенттин өзү да бул боюнча үн катты. Ага тагылып жаткан күнөөлөөлөр саясий куугунтук жана өлкө тарыхындагы шайлоого аралашкан эң масштабдуу жорук экендигин белгилеген.
"Бул саясий куугунтук жана тарыхтагы шайлоого эң жогорку деңгээлдеги аралашкан иш болуп саналат", — деп айтылат Трамптын билдирүүсүндө.
Ал Манхэттендин прокурору Элвин Брэгдин АКШнын азыркы президенти Жозеф Байдендин кызыкчылыгы үчүн "ыплас иштерди жасап жаткандыгын" белгилеген. Мунун ордуна Нью-Йоркто болуп жаткан адам өлтүрүүлөр, кишилерге кол салуулар жана башка кылмыштарга каршы күрөшүүсүн айткан.
АКШнын мурдагы вице-президенти Майк Пенс да бул боюнча пикирин билдирип, Трампты күнөөлөө өлкөдөгү саясаттын криминалдашып кеткендигинен кабар берерин айткан.
"Муну менен Американын эли биздин өлкөдө саясаттын криминалдашып кеткен кезектеги мисалын көрөт деп ойлойм", — деген Пенс CNN телеканалына.
Экс-вице-президент бул кадамдарды саясий куугунтук деп да атаарын кошумчалаган.