Баткендин Ак-Сай, Ак-Татыр, Самаркандек айылдык кеңештерине шайлоодо электрондук добуш берүү сынамык иретинде колдонулат. Бул тууралуу Узарбек Жылкыбаев Sputnik Кыргызстан радиосуна маек куруп жатып билдирди.
Анын айтымында, мөөнөтү келгендиктен Талас, Чүй, Нарын, Ош, Баткенде 14 айылдык кеңешке депутаттарды шайлоо өтөт.
"Шайлоо боюнча мыйзамдагы жаңылыктар, аялдарга коюлган квота алгачкы жолу колдонулат. Талапкерлер орто билимдүү болуп, миң сом шайлоо күрөөсүн коюшу шарт. Самаркандекте шайлоочуларды идентификациялоочу жабдыктарды колдонуу мерчемделүүдө. Жарандар атайын аппаратка бармагын койгондо, мониторго талапкерлердин тизмеси сүрөттөрү менен чыгат. Шайлоочу ошол жерден тандап, бюллетень принтерден басылып, аны шайлоочу текшерип, автоматтык эсептөөчү урнага салат. Мындан тышкары, Баткендин Ак-Сай, Ак-Татыр, Самаркандек үч айылдык кеңешке шайлоодо электрондук добуш берүү сынамык иретинде пайдаланылат. Өлкөдө миграцияда жүргөндөр көп. Буга чейин алар шайлоо укугун форма 2 аркылуу колдонуп келишкен. Бирок акыркы шайлоолордо ал жоюлуп калды. Ошондуктан электрондук добуш берүүнү тесттен өткөрүү максатталууда. Ал үчүн шайлоочулар биометрикадан өтүшү керек, электрондук кол тамгасы болушу шарт. Алар БШКнын сайтындагы кабинетине кирип каттоодон өтөт. Интернетке кошулган телефон же компьютер аркылуу аралыктан добуш бере алышат", — деди Жылкыбаев.
Ошондой эле ал үч айылдык кеңешке аралыктан добуш берүү үчүн 800дөй жаран каттоодон өткөнүн кошумчалады.