БИШКЕК, 30-мар. — Sputnik. Туристтер үчүн "Айгүл-Тоо" ботаникалык коругуна үч жылга чейин кирүүгө тыюу салынат. Бул тууралуу Баткен токой чарбасынан билдирди.
Маалыматка ылайык, мындай чара Баткенде өскөн уникалдуу Айгүл гүлүн сактап калуу жана көбөйтүү максатында көрүлүп жатат. Жарандарга 1-апрелден тартып 2026-жылдын ушул мезгилине чейин ботаникалык коруктун аймагына кирүүгө уруксат берилбейт.
Айгүл гүлү Баткендеги Айгүл-Таш тоосунун беттеринде гана өсөт. Ал тоо Баткен шаарынан 17 чакырым алыстыкта жайгашкан. Жыл сайын апрель айынын башында алгачкы гүлдөрүн ачат. 12-апрелден тарта Айгүл гүлдөп, ал эки жумага гана созулат.
Белгилей кетсек, "Айгүл-Таш" мамлекеттик коругунун аянты 253,9 гектар. Айгүл гүлү 1978-жылы СССРдин, кийин 2004-жылы Кыргызстандын Кызыл китебине киргизилген.