БИШКЕК, 25-мар. — Sputnik. Кыргызстанда 320 миграциялык мыйзам бузуу фактысы аныкталганын ИИМдин маалымат кызматы билдирди.
Үстүбүздөгү жылдын 13-мартынан 17-мартка чейин "Нелегал" рейди Ички иштер министрлигинин экстремизмге жана мыйзамсыз миграцияга каршы күрөшүү кызматы тарабынан жүргүзүлгөн.
Текшерүүнүн жыйынтыгы менен бир катар мыйзам бузуулар аныкталган:
мыйзамсыз миграцияны уюштурган 25 факт;
чет өлкөлүк жумушчу күчүн тартуу жана пайдалануу эрежелерин бузган 5 факт;
жарандарды ишке орноштуруу боюнча мыйзамсыз ишмердүүлүк жүргүзгөн 4 факт;
чет өлкөлүк жарандардын Кыргызстанда белгиленген жүрүү тартибин же эмгек ишмердигин жүзөгө ашыруу же транзиттик эрежелерин бузган 142 факт;
чек арадагы эмгектенген мигранттардын Кыргызстанда эмгек ишмердүүлүгүн жүргүзүү эрежелерин бузган 29 факт;
Кыргызстанга чет өлкөлүк жарандарды жана жарандыгы жок адамдарды чакырган же кабыл алган адамдар тарабынан алардын өлкө ичинде жүрүүсүнүн белгиленген тартибин бузган 116 факт аныкталган.
Жалпысынан милиция тартип бузгандарга 1,5 миллион сом айып салган. Издөөдө жүргөн 19 адам кармалып, экстремизм боюнча жети, баңгизатты мыйзамсыз жүгүртүү боюнча бир, мамлекеттик чек араны мыйзамсыз кесип өтүү боюнча бир факт аныкталып, 15 ок атуучу курал алынган.