БИШКЕК, 24-мар. — Sputnik. "Чакан ГЭС" компаниясынын башкы директору Нурлан Садыков менен China National Heavy Machinery Corporation ишканасынын вице-президенти Женг Хансонг Орто-Токой чакан ГЭСин куруу боюнча келишимге кол коюшту. Бул туурасында Энергетика министрлиги кабарлады.
"Кубаттуулугу 21 мегаваттка чукул үч гидроагрегаты бар чакан ГЭСтин курулушу өлкөдөгү суу байлыгын сарамжалдуу пайдаланууга мүмкүнчүлүк берет", — деп айтылат маалыматта.
Орто-Токой суу сактагычы — Чу дарыясынын агымын жөндөө жана 120 гектар сугат жерди сугаруу үчүн курулган биринчи суу сактагыч. Орто-Токой чакан ГЭСинин иштеши суу сактагычтын сугат режимине карата жөнгө салынмакчы.
"Чакан ГЭС" Улуттук энергохолдингдин курамына кирет жана чакан гидроэлектростанциялар боюнча иш алып барат.