БИШКЕК, 24-мар. — Sputnik. Кыргызстанда медициналык сүрөттөргө анализ жасоо үчүн жасалма интеллектини колдонуу боюнча келишим кабыл алынды.
Кызматташуу жөнүндөгү меморандумга Санкт-Петербургда өтүп жаткан "Дени сак коомчулук" форумуна катышып жаткан КРдин саламаттык сактоо министри Гүлнара Баатырова менен "Сбербанкынын" ден соолук индустриясы боюнча борборунун директору Сергей Жданов кол койду.
Документтин максаты — санариптик саламаттык сактоону жана медицинадагы жасалма интеллектини өнүктүрүү, заманбап медициналык AI-технологияларын колдонуу. Мунун баарын "Сбербанк" менен өнөктөш компаниялар медициналык сүрөттөргө анализ жасоо жана алдын ала диагноз коюу максатында иштеп чыгып жатат.
Баатырова саламаттык сактоо тармагындагы санариптик технологиялар артыкчылыктуу багыт экенин билдирди.
"Санариптик чечимдер дарыгерлердин убактысын үнөмдөп, ишин жеңилдетет. Бүгүн биз саламаттык сактоо тармагына жасалма интеллектини кийирүү менен алдыга чоң кадам жасадык", — деди министр.
Иштелип чыккан алгоритмдер эффективдүүлүгүн далилдеп, учурда Россиянын ар кайсы аймактарындагы медициналык борборлордо колдонулуп жатканы белгиленди.
Мисалы, COVID-19 менен күрөшүү үчүн иштелип чыккан өпкөгө компьютердик томография жасоо сервиси органдын жабыркаган бөлүктөрүн жана анын канчалык оордугун көрсөтүп берет. "Инсульттун компьютердик томографиясы" мээдеги кан айлануунун бузулушунун белгилерин аныктап берет. Маммографиялык модель сүрөттөрдү эл аралык BI-RADS шкаласы боюнча автоматтык түрдө белгилейт. Ал пайда болгон күмөндүү бөлүкчөлөрдүн контурун, залалдуу шишиктердин пайда болуу кооптуулугун аныктайт. Бул нерсе төштүн онкологиялык ооруларын баштапкы стадиясында аныктоого мүмкүнчүлүк берүүдө.