БИШКЕК, 23-мар. — Sputnik. Жогорку Кеңештин депутаты Максат Сарыбагышев түзүлө элек райондук кеңештерди кайрадан жоюуну сунуштап, мыйзам долбоорун коомдук талкууга койду.
Эл өкүлүнүн айтымында, учурда министрлер кабинети орто мөөнөттүү мезгилге административдик-аймактык түзүлүш жана региондорду өнүктүрүүнүн бирдиктүү концепциясы боюнча жол картасын иштеп чыгууда.
"Реформанын ишке ашырылышы менен административдик-аймактык түзүлүштүн азыркы структурасы олуттуу өзгөрүүлөргө дуушар болот. Аны каржылоо булагы изделүүдө. Мындан тышкары, кыргыз-тажик чек арасындагы куралдуу кагылышуудан жабыр тарткан жарандарга келтирилген зыяндын ордун толтурууга да каражат сарпталып жатат. Жогоруда айтылгандардын негизинде райондук кеңештерди түзүү актуалдуулугун жоготту", — деп жазылган маалыматтык негиздемесинде.
Белгилей кетсек, 2021-жылдын декабрында майда маселелерди жеринде чечүү үчүн райондук бюджетти калыбына келтирип, аны бөлүштүрүүчү жана көзөмөлдөөчү орган катары райондук кеңеш түзүү мыйзамы кабыл алынган. Ал үстүбүздөгү жылдын 1-январында күчүнө кирген. Бирок иш жүзүндө аткарылган жок. Райондук кеңештин депутаттарын шайлоо тартиби жана ыйгарым укуктары тууралуу мыйзам жок болгондуктан былтыр 2-сентябрда президент Садыр Жапаров жарлык чыгарып, убактылуу жобону бекиткен. Ага ылайык, 40 райондо 1 297 депутат шайланмак. Бир кеңеште райондогу калктын санына жараша 20дан 60ка чейин депутат отурмак.
Ошол эле учурда президент укуктук нормаларды даярдап үч айдын ичинде Жогорку Кеңешке киргизүүгө тапшырма берген. Бирок министрлер кабинети беш ай өткөндөн кийин парламентке келип, райондук кеңештерди түзүүнү жана депутаттарды шайлоо мөөнөтүн 2025-жылга чейин узартып берүүнү суранды. Анын себебин аймактарды ирилештирүү реформасы менен байланыштырган.