Жылуулукту сүйгөн өсүмдүктөрдүн көптөгөн түрүнө жазгы үшүктүн алып келе турган зыяны абдан чоң. Бирок жаздын алгачкы айларында алар эч кандай коркунуч туудурбайт, анткени жалбырагы жаңыдан чыккан жаш өсүмдүктөрдү үшүк албайт. Жалбырактардын чети гана жабыркап, азыраак убакыттан кийин калыбына келет. Бул тууралуу Нурбек Малабаев Sputnik Кыргызстан радиосунун эфиринде маек куруп жатып билдирди.
Анын айтымында, данектүү жемиштерди үшүк алып кетүү коркунучу жогору.
"Бир катар өсүмдүктөр үшүктү тоготпойт деле. Биринчиден, бул суукка чыдамдуу өсүмдүктөр, алар олуттуу зыян албастан төмөн температурага туруштук бере алышат. Алсак, петрушка (-7...-9 градуска чейин), сабиз (-5...-7), сельдерей (-3...-5), пияз, укроп өӊдүү өсүмдүктөр -5...-7 градуска чейин чыдайт. Кээ бир өсүмдүктөр, ал тургай, кыска убакытта жүргөн кескин сууктан улам бир азга чейин өсүүсүн токтотушу мүмкүн. Айрымдары тоӊуп өспөй калат. Мисалы, алча, алма, шабдалы, алмурут, өрүк, кара өрүк сыяктуу данектүү жемиштер жөнүндө сөз кыла турган болсок, -4 градуска жакын температура алардын бүчүрлөрүнө зыян келтирет. Алар гүлдөө мезгилинде абдан аялуу болуп саналат да, -2 градуста эле үшүк алып кетет. Үшүктөн коргоонун көптөгөн жолдору бар. Алардын айрымдары мыкты натыйжа берет. Алсак, жамгырлатып сугаруу, түтөтүү, коргоочу баштыктар жана үшүктөн сактоочу жер семирткичтерди чачуу ыкмалары бар", — деди Малабаев.
Ал үшүктөн стресс алган өсүмдүктөргө кам көрүп, анын андан ары өсүп, жакшы түшүм беришине өбөлгө түзсө болорун кошумчалады.
Буга чейин ӨКМ 17-19-мартта түнкүсүн жана эртең менен Чүй облусунун дыйканчылык аймактарында аба ырайынын температурасы 0…-2, Талас облусунун дыйканчылык аймактарында -1…-3 градуска төмөндөп, үшүк жүрүшү күтүлөрүн айткан.