Дарыгер иш учурунда оору жуктуруп албаш үчүн биринчи кезекте иш берүүчү бардык шарттарды түзүп берүүсү керек. Экинчиден, медик өзү да эрежелерди сактап иштөөсү зарыл. Ал эми бул эки этап тең аткарылып, бирок дарыгерге илдет жугуп калган учурда аны атайын комиссия иликтейт. Ошондон кийин гана алган жаракатына карата иш берүүчүнүн күнөөсү аныкталат. Бул тууралуу Бахтияр Станбеков Sputnik Кыргызстан радиосуна маек куруп жатып билдирди.
Анын айтымында, кээ бир медицина кызматкерлери өз укуктарын билбей, төлөнүүчү компенсациядан куру калышат.
"Дарыгерлер иш учурунда оору жуктуруп алса анын дарыланганын, майыптык алса пособиесин иш берүүчү төлөөгө милдеттендирилет. Мындан сырткары, жумушун аткарып жүрүп кырсыкка кабылып көз жумган учурлар кездешет. Өзгөчө тез жардам медиктеринде мындай окуялар бар. Бирок айрым учурларда иш берүүчүлөр комиссиянын чечимин аткарбай, каражат төлөөдөн баш тартып, убакытты өткөрүп жүрө беришет. Мындай болгон кезде жабырлануучу дарыгер же анын жакындары чочулабай эле профсоюздар комитетине же башка юристтерге кайрылып, консультация алып, сотко берүүсү зарыл. Анткени төлөбөй убакыт өткөрүп жиберүү менен ал иш берүүчү жоопкерчиликтен бошотулбайт. Тескерисинче, инфляциянын өсүшү менен төлөнчү каражаттын суммасы көбөйүп, миллиондорду чапчып кетет, аны төлөө мөөнөтү да эскирбейт. Башкача айтканда, төлөп берип гана кутула алат", — деди Станбеков.
Ал дарыгер кызматын аткарып жатып жабыркаган учурда эки тарап келишип алып азыраак каражат алуу менен токтоп калбай, мыйзам чегинде өз укуктарын коргошу абзелдигин кошумчалады.