БИШКЕК, 17-мар. — Sputnik. Өзгөчө ири өлчөмдөгү акча каражатты мыйзамсыз чыгарып кеткендиги үчүн "Кыргызнефтегаз" ишканасынын мурдагы жетекчилиги кармалды. Бул тууралуу УКМКнын маалымат кызматы кабарлады.
Билдирүүгө ылайык, 2017-2020-жылдар аралыгындагы Б.Р.А. аттуу төраганын жетекчилиги астында күйүүчү-майлоочу майларды арзандатылган баада сатуу үчүн келишимдерди түзүү максатында жалданма фирмаларды түзгөн коррупциялык схема аныкталган.
"Базар баасы менен сатуунун ортосундагы айырма 1 литр мунай продуктылары үчүн 5 сомду түзгөн. Мындай иштер "Кыргызнефтегаздын" жетекчилиги жана бийликтин жогорку баскычтарындагы колдоочулары тарабынан жасалып турган. Бирок кийин аталган фирмалар жоюлуп, төлөнбөй калган салыктар 400 миллион сомдон ашык экени аныкталды", — деп айтылат маалыматта.
Ишкананын мурдагы жетекчилиги менен биргеликте коррупциялык схеманы уюштурууга көмөктөшкөн төрт адам кармалып, УКМКнын Жалал-Абад облусу боюнча тергөө абагына киргизилген.
Азыркы учурда мамлекетке келтирилген зыянды аныктоо жана анын ордун толтуруу боюнча тергөө иштери жүрүп жатат. Кармалгандардын 300 миллион сомдон ашык суммадагы кыймылдуу жана кыймылсыз мүлкү камакка алынды.
Аталган факты боюнча Кылмыш-жаза кодексинин 336-беренесинин (“Коррупция”) негизинде кылмыш иши козголгон.
Ошондой эле УКМК Б.Р.А. башкарган төрт жылда компаниянын кирешеси 2 миллиард 977 миллион сомду түзгөнүн, ал эми жетекчилик алмашкандан кийин акыркы эки жылда (2021-2022-жылдары) ишкананын таза кирешеси 5 миллиард 800 миллион сомдон ашканын белгиледи.