БИШКЕК, 16-мар. — Sputnik. Улуттук госпиталдын башкы дарыгери М.Т.И. кармалды. Бул туурасында Улуттук коопсуздук боюнча мамлекеттик комитеттин маалымат кызматынан кабарлашты.
Аталган ооруканага Маанаев Токтобай Исраилович башкы дарыгерлик кылып турган.
Ал акча жеген коррупциялык системаны уюштурган деп шектелүүдө. Комитет үзгүлтүксүз опузалоо, тендер өткөрүүдө акчаны кайтарып алуу, жеткирүүчүлөрдөн жогорулатылган баада мамлекеттик сатып алуулар, дары-дармектерди жасалма эсептен чыгаруу фактыларын санады.
Атайын жүргүзүлгөн ыкчам иликтөө иш-чараларынын натыйжасында медицина кызматкерлеринен акча талап кылуу боюнча 20дан ашык фактылар катталган.
"М.Т.И. практикалык дарыгер болуп туруп, жеке кызыкчылыгын көздөп бөлүм башчыларына жана дарыгерлерге адам чыдагыс шарттарды түзүп, бейтаптардан системалуу түрдө акча алууга жана ага акча которууга мажбурлап, ошондой эле бир жолку реквизицияларды жүргүзгөн", — деп айтылган маалыматта.
Мыйзамсыз киреше алуу жана жеке баюу боюнча анын ишмердигинин дагы бир өңүтү мамлекеттик сатып алуулар болгонун билдиришти. Финансылык-чарбалык иштин аудити айрым медициналык багыттагы буюмдарды ашыкча сатып алуу жана кымбат баалуу дары-дармектерди эсептен чыгаруу фактыларынын бар экендигин көрсөткөнү айтылат.
2022-жылдын октябрь айында иммуномодуляциялоочу дары-дармектерди (төмөн жана жогорку дозада интерферон, окрелизумаб жана ритуксимаб) жеткирүү боюнча тендердин жыйынтыгы боюнча, жеңүүчү компания ашыкча баада жеткирилген, анын натыйжасында бюджет 36 миллион 205 миң 791 сом зыян тарткан.
"Мындан тышкары, 2022-жылдын май айында дары-дармектерди: милдронат, пропофол жана магний сульфаты, ошондой эле 25 миллион 510 миң 700 сомго медициналык кол каптарды сатып алуу үчүн М.Т.И. Дары-дармек каражаттары жана медициналык багыттагы буюмдар департаменти менен рынокко мониторинг жүргүзүү, бааларды макулдашуусуз, белгиленген тартипти бузуу менен бир жерден сатып алуу ыкмасы колдонулган. Баса белгилей кетүүчү нерсе, туунду компаниялар менен мыйзамсыз келишим түзүлгөн. Сатып алуулар жөнүндө кулактандыруу жарыяланган эмес. Муну менен бюджетке 11 миллион 723 миң сом зыян келтирилген", — деп билдиришти атайын кызматтан.
УКМКдан стерилдүү эмес медициналык кол каптардын бир пакетинин рыноктук чекене баасы 500 сомдон ашпастыгын, ал эми Улуттук госпиталь алардын бир пакетин 1 200 сомдон, жалпысы 5 миллион 356 миң сомго сатып алганын айтып беришти.
"Улуттук госпиталь — эң ири медициналык мекеме, жылдык бюджети донордук жана гранттык каражаттарды кошпогондо 700 миллион сомдон ашык. Анын ичинен 370 миллион сому дары-дармек жана медициналык буюмдарды (дарылар, протездер, рентген/ультраүн аппараттары) сатып алууга, ошондой эле учурдагы керектөөлөргө жумшалат. Ошентип, текшерүү мамлекетке өзгөчө ири өлчөмдө жана 40 миллион сомдон ашкан зыянды аныктады", — деп билдиришти атайын кызматтан.
Учурда УКМК башка коррупциялык фактыларды, ошондой эле жогоруда аталган схемаларга тиешеси бар кызмат адамдарын аныктоо боюнча ыкчам тергөө иш-чараларды жүргүзүп жатат.