БИШКЕК, 14-мар. — Sputnik. Жогорку Кеңештин депутаты Жаныбек Абиров мушташкан окуясы боюнча жабырлануучу тараптан жана шайлоочуларынан кечирим сурады.
"Урматтуу кыргызстандыктар! Мага байланыштуу окуяга баарыңыздар күбө болдуңуздар. Учурда укук коргоо органдары иликтеп жатат, мен алар менен кызматташып, бардык керектүү маалыматтарды берүүгө даярмын. Кыргызстандын мыйзамдарына ылайык жоопкерчилик тартууга даяр экендигимди жана болгон окуянын олуттуулугун толук түшүнүп жаткандыгымды баса белгилегим келет", — деп жазды Абиров.
Ошондой эле ал эл өкүлү катары кандай гана жагдай болбосун эмоцияга алдырбашы керектигин моюндаган.
"Ооба, мен ката кетирдим, чоң күнөө мойнумда бар жана кырдаалды жөнгө салуу үчүн бардык күч-аракетимди жумшоого даярмын. Аргенден (жабырлануучу — ред.), анын үй-бүлөсүнөн, жакындарынан чын жүрөктөн кечирим сураймын жана бардык колдоолорду көрсөтүүгө даярмын. Ошондой эле окуяга байланыштуу кыргызстандыктарды жана жалпы шайлоочуларымды кабатырланткандыгым үчүн кечирим сурайм. Апаларыбыздын жүрөгү эч качан оорубасын. Кечээги окуя үчүн терең өкүнөмүн. Мени кечирип коюуңуздарды суранамын", — деп кайрылды депутат.
Эске салсак, 12-мартта социалдык тармактарга депутат Жаныбек Абировдун мушташка аралашып бир жигитти сабап жаткан видеосу тараган. Ал башынан жаракат алып ооруканага кайрылган. Ошол эле учурда социалдык тармактарга күзөт агенттигинде иштеген, аты аталбаган кишинин чатакка байланыштуу билдирүүсү жазылган. Анда ресторанга чакырык менен жетип барган ыкчам аракетке келүүчү топтун эки кызматкерин ошол жерден онго чукул адамдын сабаганы айтылган.
Ал арада президент Садыр Жапаров Ички иштер министрлигине бул окуяны ар тараптуу иликтөөнү тапшырган. Кечээ мушташка катышкан деп эки адам кармалды.